2021.10.11 දින සිට 2020/2021 අධ්‍යයන වර්ෂයට අදාළ පළමු සමාසික විභාගය ආරම්භ කොට ඇත. සනාතන සභා අනුමැතිය සහිත ව පවත්වනු ලබන මෙම විභාගය සඳහා සියලු සිසුන් සහභාගී විය යුතුය. 2020/2021 අධ්‍යයන වර්ෂය සඳහා නියමිත පළමු සමාසික විභාගය මෙය වන අතර මෙම විභාගය නැවත වරක් නොපැවැත් වේ.
යම් හෙයකින් කිසියම් සිසුවෙකුට නියමිත පරිදි විභාගයට පෙනීසිටීමට නොහැකි වුවහොත් ඉදිරියේ දී පවත්වනු ලබන (2022 වර්ෂයේ දී) පළමු සමාසිකයේ විභාගයකට පෙනී සිටිය හැකිය. එහෙත්, පහත සඳහන් ගැටලු පිළිබඳ වගවීම ඔහු සතුවේ.
01. සිව්වන වසර සිසුවෙකු මෙම විභාගයට පෙනී නොසිටිය හොත් ඉදිරි වර්ෂයක දී පැවැත්වෙන පළමු සමාසික විභාගයට පෙනී සිටිය යුතුය. එහි දී විස්තරාත්මක උපාධි සහතිකය නිකුත්කරනුයේ ඔබ අවසන්වරට විභාගයට පෙනී සිටිය දිනය සැලකිල්ලට ගෙනය.
02. තෙවන වසර සිසුවෙකු මෙම විභාගයට පෙනී නොසිටිය හොත් පළමු සමාසික විභාගය පවත්වන අවස්ථාවක දී ඒ සඳහා පෙනීසිටිය හැකිය. ඔබ ශාස්ත්‍රවේදී (සාමාන්‍ය) උපාධිය හදාරන අයෙකු නම් ඔබගේ විස්තරාත්මක උපාධි සහතිකය නිකුත්කරනුයේ ඔබ අවසන්වරට විභාගයට පෙනී සිටිය දිනය සැලකිල්ලට ගෙනය.
03. දෙවන වසර සිසුවෙකු මෙම විභාගයට පෙනී නොසිටිය හොත් පළමු සමාසිකය සඳහා විභාගය පවත්වන අවස්ථාවක දී ඒ සඳහා පෙනී සිටිය හැකිය. එහි දී සමාසික දෙකකට අදාළ විභාග සඳහා එකවර පෙනී සිටීමට සිදු වේ.
04. පළමු වසර සිසුවෙකු මෙම විභාගය සඳහා පෙනී නොසිටිය හොත් ශාස්ත්‍රවේදී (විශේෂ) උපාධි පාඨමාලාවට ලියාපදිංචි වීම සඳහා ඉල්ලුම් කිරීමට සුදුසුකම් නොලබයි. ඒ අනුව, ඉදිරි වර්ෂයක දී පවත්වනු ලබන පළමු සමාසික විභාගයක් සඳහා පෙනී සිට එම වර්ෂයේ සිසුන් සමග ශාස්ත්‍රවේදී (විශේෂ) උපාධිය සඳහා ඉල්ලුම් කිරීමට අවස්ථාව සැලසේ. එමෙන් ම සමාසික දෙකකට අදාළ විභාග සඳහා එකවර පෙනී සිටීමට ද සිදු වේ.
මෙම කරුණු සැලකිල්ලට ගෙන මාර්ගගත ක්‍රමය ඔස්සේ පවත්වනු ලබන මෙම විභාගය සඳහා උනන්දුවෙන් යුතුව පෙනී සිටින ලෙසත් කිසියම් ශිෂ්‍යයෙක් / කණ්ඩායමක් / පාර්වශයක් විභාගයට පෙනී නොසිටින ලෙස ඔබට යම් බලපෑමක් කරන්නේ නම් ඒ පිළිබඳ පීඨාධිපතිවරුන් දැනුවත් කරන ලෙසත් දන්වා සිටිමි.
මහෝපාධ්‍යායයන් වහන්සේ (ධුරයේ කාර්යයන් ඉටුකරන)
2021.10.11
Buddhist and Pali University of Sri Lanka